Lateinische Texte zur Mettener Lokalgeschichte Altmettenertreffen Regensburg

Domine Abbas plurimum reverende, commilitones illustrissimi, hospites valde spectabiles, dominae et domini maxime honorabiles!

Quippe cum per 25 fere annos associationi Metamensi Ratisbonae praesiderem, mihi munus honestum brevis allocutionis festivae habendae demandatum est. In honorem hospitum Metamensium voce latina seu lingua Tulliana utor. Sed, sodales carissimi, vobis diu molestum esse nolo, nam multis vestrum lingua, quam quondam diligenter didicistis, interea oblivione obruta est.

Nunc, laetissimis animis Dominum Abbatem, patremfamilias Metamensem honoratissimum, salvere iubemus, pari modo clamore excipimus P. Rabanum, magni aestimatum, promotorem indefessum rei Metamensis in singulis regionibus Bavariae et redactorem sollertem illius libelli, qui ab ornnibus semper impatienter exspectatur et, cum apparet, continenter legitur, ne dicam avide devoratur. Qui libellus "Alt und Jung Metten" dicitur.

Summis laudibus P. Egbertum dilectum efferimus, qui nuper "meriti Cruce" Republicae Foederatae Germaniae decoratus est. Quae decoratio in aula festiva gymnasii ab honorabili D. Dick, spatio vitae protegendo administro, ei data est. P. Egbertus per 35 annos praefecti munere magna cum sollertia et fide et diligentia functus est. Felicia quaeque, fausta atque profutura Tibi exoptarnus. Conventus hodiernus est sessio iubilaea. Nam anno 1907 consociatio Metamensis Ratisbonae condita hoc anno diem anniversarium septuagesimum quintum agere potest. Conventus adhuc in hac domo hospitali, quam Bischofshof dicunt, locum habuerunt. Sed ultimis annis belli per totum orbem terrarum saevientis secundi sodales rarius atque rarius huc convenerunt et postremo consociatio obdormivit. Anno 1948, accurate die 14 Mensis Decembris, id est cras, commilitones Ratisbonae et regionis vicinae, e bello et captivitate reversi, associationem reviviscere conati sunt, quod prospere successit.

Singulis mensibus sodales huc congrediuntur amicitiae colendae et vinculo pietatis cum Alma Matre Metamensi sustinendo. Neminem vestrum fugit, quantum humanitatis, quantum doctrinae, quantum cultus ingenii, Alma Mater Metamensis nobis dederit, quod fundamentum nos fert, dum spiramus.

Sermoni finem faciens mihi nihil restat nisi ex animo opto: Associatio Metamensis et Alma Mater Metamae porro vivant, crescant, floreant